Herbscht isch Erntezeit. Normalrweis. Dia Tag isch dr Schorsch durch Schtreuobstwies dappt, ond was’r gseah hât, des hât’m wirklich s’Wasser en d’Auga trieba. Was hât’r am Âfang vom Jâhr für große Plä’ ghet. An Teil von dene Äpfl ond Birna, dia dätet an feine Most geba, an andre Teil von de Birne, die kennt’ mr prima einschlage ond drnach an hochprozentige Schnaps brenna lassa, ond dr Rest, den dät mr wia jed’s Jâhr ufflese ond abgeba, drmit mir übrs Jahr a feins Apfelsaftschorle trenka kâ.

Dia bleede Froschtnächt em April schlaget jetzt abr voll durch. Dr große Birnabaum, der isch oifach leer. Mit ma Fernglas muas mr dia Champagner-Renetta sucha, weil’s bloss ganz weit oba a paar Äpfl gibt. Koi Chance dia mit dr Leitr rondrzomglauba, geschweige denn, mr könnt’ se mit ma Haka rondrschüttla. Uff am andre Bäumle funkla wenigschten zwoi handvoll von dene rotbackige Früchtla. Die werdet jetzt komplett übrwacht, en Watte eipackt ond au no liebevoll streichelt – damit’s wenigschtens an Äpfelkucha langt.

A guate Woch’ ond em Herrgott sein Sega