Am Sonndig isch’s soweid: Dr VfB schdeigt wieder auf end Bundesliga. S’wird au Zeit. Lang gnuag hämm’r ons mit denne Dissldorfr, Heidaheimr ond Karlsruhr messa missa. Dia hend zwar zom Doil au an guada Ball g’schbielt, aber, semmr ehrlich: D’r VfB gherd oifach end erschda Liga. Au wenn’r sein Abschdieg em ledschda Johr ondr’m Schdrich vielleichd verdient hod, des g’herd leidr au zor Wohrrad. Hondsmend hemm’r g’schbielt, koi gotziga Philosophie hemmr g’heht. Des hod scho schwer an onsrm schwäbischa „Mir send mir“ gnahgd. S’ dodale Chaos war’s, a lausigs Bild hemmr agebba. Abr mir hend draus glernd – ond heddad ons dr Aufschdieg jetzt au wirklich verdient. Aber om a Hohr hedad mirs em ledschda Schbiehl beinoh doch no verbassalad, wo mr gega Hannover so wiaschd verlora hend. Bloaß guad, dass d’ Braunschweiger so an rabaschwarza Dag g’hed hend ond sechs Kischda g’fanga hend. Do verliersch Nerva. Ond jedzd muass ma bloß no oimol schlofa, dann semm’r wieder oba.

A guate Woch’ ond em Herrgott sein Sega.