Es isch scheint’s jetzt Wahlkampf. Des Ganze isch allerdengs en dem Jâhr am zehmlich langweilige Sach’. Dâ hât mr en de vrgangene Jahrzehnt’ schon ganz andre Dengr erlebt. Dâ henn dia Kontrahenda mit härteschte Bandage gegaandr doa. Jetzt hänget se halt ihre Plakätla an Strâß nâ. Ond wenn mr oinige von dene genau aglotzt, so kâ mr sich net dem Eidruck erwehra, dia häbet dessmâl irgendwelche Praktikanta zsammagschuschtert. A Beischpiel gfällig? Nemma mr mâl des Kandidataplakat, uff dem die rot’ Farb’ überwiegt. Wie kriegt mr eigentlich so a Grinsa bei ma Porträt na? Dr Schorsch erinnert des ganz schtark an dr Jack Nicholson, wia’r em Batmannfilm vom Jâhr 1989 den Joker gschpielt hât. Abr au des Plakat mit dr schwarza Grondeinschtellong lässt oin mit Frâga alloi. Wer isch des – ganz ohscharf – em Hendrgrond vom Kanditaporträt, ond was soll oim des saga? Dia oinzig Erklärong für dr Schorsch isch, des kâ bloss dr Jogi Löw sei, abr der hât sich net deutlich zeiga wella.

A guate Woch’ ond em Herrgott sei Sega