Seit geschtern fühlt sich dr Schorsch diskriminiert. Noi, net weil’r sich wega seim wondrbare Dialekt gelegentlich fascht scho rechfertiga muas – des macht’m scho lang nex me aus, dâ isch’r nadierlich selbschtbewusst gnuag. Dr Grond isch a ganz andrer: Em ma große Eikaufszentrum, da send emmer so Werbe-Âbiatr-Schtändla – neudeutsch dät au „Promotion-Counter sage. Ond geschtern hât so ganz adretts Fräulein die Vorteil’ von ihrm Inschtitut für Haar-Entfernong âpriesa. Ond was isch passiert? Sie hât doch dr Schorsch oifach ignoriert. Drei Mâl isch’r an dem Schtändle vorbeiflaniert, koi Reaktion, koi Âsprâch, koi Âgebot vom dem Mädle, ob’r denn dia Haarentfernong net âmol ausprobiera wöllt. Dr Schorsch kâ sich des oifach net erklära. Halt doch! Vielleichts liegt’s jâ am Schorsch seim Vollbart, weil sich des Mädle net traut hât.

A guate Woch’ ond em Herrgott sein Sega