Dr Schorsch vrzählt vom 3. März 2018

Dr Schorsch vrzählt seit 21. Februar 2015 jeden Samschtich en der Bietigheimer, Sachsenheimer, Bönnigheimer Zeitung.

Mr kâ’s eigentlich nemme höra. Nuff ond nondr gâht’s bloss no om dr Feinstaub. Ond dia Diskussion wird emmer vrücktr. Dâ wird jetzt doch tatsächlich übrlegt, ob mit meh’ Fahrrädr dia “bedrohlich Feinstaub-Belaschtung” eindämme kennt. Ja saget amol, net omsonst hât dr Mensch dr Motor erfonda, om dia Mobilität von de Leut‘ möglich zom mache. Ond des sott au so bleiba, fendet dr Schorsch, weil wia kennt er sonscht seine weitweg wohnende Kender ond Kendeskender besuche? Ond wia sott’r mit ma Fahrrädle von A nâch B komma, mit seinr Arthrose en den Knieglenk? Odenkbar. Vielleicht no a kloine Âmerkong: Dr österreichische Verkehrsclub hât jetzt gschrieba, dass die 25 gröschte Containschiff so viel Schadstoff ausstoscha wia 750 Milliona Autola. Ond wer frâgt nâch dr Luftbeschlaschtung durch Lastwaga, Flugzeug odr gar Kreuzfahrtschiff? Klar dia Schiffle fahret net durch Neckarstrâß‘ en Stuttgart, abr mr muas ja dia Schadstoff-Belastung durchaus global seha. Abr es isch ja s’Oiffachste uff dia arme Teufel neizomschlage, dia mit ihre Dieselautole durch Gegend bromma, ond dia sich net wirklich gega dia Vrteufelong von ihre Heilix-Blechla wehra könnet. Des sagt Schorsch, wo koin Diesel fahrt.

A guate Woch‘ on dem Herrgott sein Sega