Dâ haut’s oim jâ dr Vogl naus. Dr Steuerzahlrbond hât jetzt onsere Herrschaftskerle von dr Landesregierong wiedr âschtendig dia Levitta glesa – ond mit Recht. Des Landwirtschaftsminischterium hât nämlich so gschwend âmol 305 000 Euro für a Internetseitle zom Fenschter nausgschmiessa. Für den Schnäpplespreis kriagt mr ondr „Mach’s Mahl“ – was für a hirnloses Wortschpiel soll denn des sei? – Rezeptle, mit dem Hendrgedanke von denne minischtriale Bachel, des dät zu meh „Ernährungsbildung“ bei de Leut’ führa. Oh, arm’s Schwâbaländle. Für des Geld hät’ mr leicht Kartoffla für knapp a drei Viertel Million Portiona Äbiara-Salat kaufa ond ondr de Leut’ vrtoila könna. Des wär nâ a rechte Ernährungsbildong gwä.

Em Übriga brauchet mir dâhanna gar koi Ernährungsbildong – ond von oba ra scho glei gar net. Mit wisset no, wia mr an Gaisburger Marsch macht, oder Linsa mit Schpätzle ond Soitawürscht, odr an Ofaschlupfer, odr an rechta Sonndichsbrâte mit ma Haufa Soß’, odr natürlich onsre legendäre Maultauscha. Dâ brauchet mir koi Internetseit. Wenn’s sei muas, nâ fraget mir d’Oma, dr Großvater oine vom Landfrauaveroi, dia wisset’s.

I wünsch’ Euch a guate Woch’ ond em Herrgott sein Sega