Nr. 159: Dr Schorsch vrzählt vom 16. Juni 2018

Dr Schorsch vrzählt seit 21. Februar 2015 jeden Samschtich en der Bietigheimer, Sachsenheimer, Bönnigheimer Zeitung.

Dia Warterei hât jetzt endlich a End. Die Fußball-WM hât âgfanga ond onsre Buabe schnürrat morga ihre Kickstiefl ond hauet möglichst oft di Kugl ens Aluminiumgehäuse. Dr Schorsch hât natürlich koin Zweifl dâdrübr, onsre Buaba werdet Weltmeischtr. Onsr badischr Jogi, ond dâmit au onser Landeskend – mr kâ’s ja net oft gnuag wiederhola: mir ondrscheidet bloss zwischa Württembergr ond Badner, weil boide em gleicha Volksstamm âghöret – hât scho viele rechte Kerle mitgnomma: en dr Abwehr Matthias Ginter, Joshua Kimmich ond Marvin Plattenhardt, em Mittelfeld ond em Sturm Mario Gomez, Sami Khedira, Sebastian Rudy ond Timo Werner. Alles Buabe mit familiäre Wurzla bei ons em Ländle. Ond wenn mr nâ no dr Antiono Rüdiger ond dr Niklas Süle, dia ihre fußballerische Spohra sich bei ons vrdient hen, drzua nemmt, nâ kâ jâ gar nix meh’ passiera. Ond zua gutr letzscht hen mr au no dr Co-Trainer Thomas Schneider, der emmerhin von seinr Jugend ond später zwölf Jâhr als Vrteidigr beim VfB kickt hât.

Morga a schees Spiel gega Mexiko, a guate Woch’ ond em Herrgott sein Sega.