Dr Schorsch wird net schnell zornig. Doch, was der „Kabarettist“ Florian Schröder beim „Das große Kleinkunstfestival“, was dr RBB am Samstich ausgstrahlt hât, von sich geba hât, des war so ondrirdisch liedrich, dâ hât’s em Schorsch grad dr Vogl nausghaue. Mr muas wissa, dass der Kerle beim großa Fernsehsendr em Südwesta au sei Geld vrdient, oimâl im Radio mit „Die ganze Welt feingehackt und durchgeschrödert“ ond mit dr Moderatio von dr „SWR-Spätschicht“. Dr Schorsch isch jâ bisher dr Moinong gwä, om ens öffentlich-rechtliche Fernseha zom komma, braucht’s a mendest Maß an Qualität. Dr Schorsch gönnt ihm uff jeden Fall den Karrieresprong von ganza Herza, ond eigentlich müsst scho alloi di Tatsach’, dass’r seine Späßla am ma große Radio- ond Fernsehpublikum präsentiera därf, doch langa, om sei badisch’s Minderwertigkeitsfühl zu kompensiera.

Doch des isch scheint’s doch net so. Anders isch’s wirklich net zom erkläre, worum der Kerle bei dr RBB-Sendung so ohsäglich tief en dr Abort neigriffa hât. „Die Schwaben sind das Allerschlimmste, das ist die allerschlimmste Pest. Wie die schon Deutsch reden: ,woisch’, ,hâsch’, ,kann’sch’, ,mach’sch’. Dieser Geiz.“ Er habe ihn auf der Treppe angesprochen: „Möchtest Du zu uns zum Essen kommen. Was sagt er? Koscht’s was?“ Nett, abr halt net lustig. Ond, was soll dr Schorsch sage, mit seine ohsägliche Platitüda hât’r no net gnuag ghet: „Schwaben sind die allerschlimmste Gruppe, die wir in Deutschland haben. Die allerschlimmste. Die allerschlimmste Pest sind die Schwaben.“

Er därf des sage, hât’r gmoint, weil er dät jâ au aus em Süda komma. „Ich bin aus Baden. Ich bin einer von den Guten. Bitte merkt Euch, Baden gut, Schwaben böse.“ Nâch dem seim Lettagschwätz könnet abr d’Schwâbe next drfür. „Die Schwaben können nichts dafür, die sind historisch in einer anderen Epoche stehen geblieben. Wenn Du aus Bietigheim-Bissingen kommst, das ist das Pjöngjang des Südens. Da hast Du einfach keine Chance mehr.“

Dr Schorsch müsst jetzt zom wiedrholta Mâl erkläre, mir ondrscheidet zwischa dem Königreich Württemberg ond dem Großherzogtum Baden. Weil (des kâ’ mr em letzta „Schorsch vrzählt“ vom 15. Septembr nâchlesa) dr Großteil von de Badener ghöret zum gleiche Volksstamm wia dia meischte em Südweststaat – zu den Schwâbe. Des sott mr eigentlich wissa, wenn mr als Kabarettist mit seinr Herkunft kokettiert. Abr vielleicht duat’s halt au bloss weh, weil mir schaffige, fleißige und sparsame Schwâbe so großzügig onsere ärmere badisch’ Vrwandschaft am Erfolg Toil haba lasset.

Oi Hoffnung gibt’s abr. Fast uff dr Tag genau, wird der Schröder 2019 40 Jâhr alt. Da wird dr Schwâb gscheit – au dia Badener.

A guate Woch’ ond em Herrgott sein Sega.