Mit Muckafug isch dr Schorsch en frühestr Jugend sozusaga sozialisiert worde. Eigentlich isch des donkle Gebräu aus Zichorie gschmacklich net grad a Offenbarong, abr als Kend war’s oifach klasse, wenn mr, wia dia Große, eba au an „Kaffee“ kriagt hât. Irgendwia isch des sicherlich dr Grond gwä, dass em Schorsch sei Lieblingsgesöff au heut’ no Kaffee isch, odr wia mr frühr politisch völlig ohkorrekt gsagt hât – dr Mohrentrank. So a Tagesration von schätzungsweis’ knapp zwoi Litr schlürft’r so genüsslich en sich nei, en ondrschiedliche Variante. Au gern amol an Espresso. Deshalb isch dr geschtrig Freitag au a bsonder’r Feschtag für dr Schorsch gwä. Weltweit hât mr nämlich dr „Tag des Espressos“ gefeiert. Schee, wenn mr koine andere Sorga hât.

A guate Woch’ ond em Herrgott sein Sega.