Âkomma in dr aluminium-blonda Lebensphas duat mr gern en Erinneronga schwelga, grad wenn se em Fernseha drzua eiladet, uff vrgangene Jahrzehnt zom zrückglotza. Jetzt hend se a Lobliad uff dia 1970er-Jâhr brâcht, a Dekad’, dia mit ihrer Musik, ihrer Idea ond gsellschaftliche Vränderonga bis heut’ nâchwirkt. Für dr Schorsch waret des dia Jâhr, dia ihn als dâmals Pubertierendr prägt henn. Mit wache Auga send die Buaba en 1970er-Jâhr durch Welt gânga. Ganz uffregt henn se staunend glotzt, wia die Freiheit grad bei de Fraua ihr’n Lauf gnomma hât, denn dia henn reihaweis ihre Büstahaltr weggschmissa. Älles was eiengt isch eba abglehnt worda. Irgendwia isch di Freiheit in de letztsche drei Jahrzehnt vrlora ganga.

A guate Woch’ ond em Herrgott sein Sega.