Heidanei, was send denn dia Tübenger Forscher für Käpsala: A Forschungsteam um Madelaine Böhme hât rausgfonda, dass dr uffrechte Gang net en Afrika erfonda worda isch, sondern em Ostalläu. Aus vrstoinerte Knocha vom ma Zwischadeng zwischa Aff’ ond Mensch henn se – wia au emmr dia des gmacht henn – festgstellt, vor meh’ als zwölf Milliona Jâhr isch der „Danuvius Guggenmosi“ scho uffrecht am ma Bachlauf omandr gloffa. Somit wird nex wenigr als die bisherig’ menschlich’ Evolition uff dr Kopf gstellt. Ond was bedeutet des? Nemma mr di Erkenntnis von Dr. Gerhard Raff zur Hand, wonach zu Schwaben au dia seit Napoleon völkerrechtwidrig ondr bayrischr Verwaltung stehenden Ostgebiet zwischa Iller ond Lech ghörat, nâ wird ois klar, was mr eigentlich scho emmer hät wissa könna: Mir Schwâbe hend also dr uffrechte Gang erfonda.

A guate Woch’ ond em Herrgott sein Sega.