Ach Gottle, wia schee. Oabhängig von dr CO2-Bilanz ond dem dâraus resultierenda Weltondrgang knallet dia elektrische Adventslichtr jetzt wiedr en d’Nacht nei. S’isch a wahre Pracht, wia die Innastädt, dia Vorgärta, Fenschtr rond Fassada wiedr strahlet. Ganz egal, ob dene Stromzählr, sehr zur Freid von dr EnBW, schwendlig wird, s’wird en dr Adventszeit beleuchtet, was sich net drgega wehra kâ. Au dr Schorsch isch ganz beseelt, hât’r doch vier osennig scheene alte Theaterscheiwerfr für sei Kleinkunstbühne gschenkt kriegt. Nuffgnagelt an Decke, professionell vrkabelt ond jedr oinzle steuerbar, machet dia uff dr Bühne so a wonderbars Licht. Ondr dem männlich belegta Überbgriff „Jedem Mâ sei Eisabâh’“ freut sich dr Schorsch wia a klois Kend übr diese bühnentechnische Erongaschaft, ond er stellt sich vor, wia des wohl wär’, wenn irgendwann mit dene Scheiwerfr au Künschtlr uff der Bühne ens rechte Licht gsetzt werdet. S’dauert halt no. Ond so schaltet Schorsch oifach so seine Bühnascheiwerfr â. Vielleicht gâht jâ irgendoim dâmit bald a Licht uff.

A guate Woch’ ond em Herrgott sein Sega.