Er ziert s’Gsicht, übrwiegend bei de Männer. Dr Schorsch schreibt heut’ übr dr Bart. S’gibt’n jâ en älle Facette vom Drei-Tag-Bart, übr das denne Menjou-Bärtle und seim Vetter, am „Porno-Balka“, bis zom mächtig ausladenda Vollbart, der heut’ zom Teil bis ens letzschte ondolierte Barthärle drapiert isch.

Für dr Schorsch gibt’s bloss oin Bart, ond zwar den, wo mr oifach wachsa lässt. Weil des kommt am Schwâb sehr entgega. Noi, s’gâht net om dia Sparerei von Rasiersoif’, Rasierklenga odr Rasierwassr. S’gâht tatsächlich om den Gwenn an Lebenszeit. Machet mr mâl a kloine Rechnong uff. Mit etwa 16 Jâhr wächst ma Mâ an Bart ond bis zom Altr von etwa 85 muss’r sich also rond 70 Jâhr lang rasiera. Wenn mr schnell isch, nâ braucht mr rond zehn Minuta am Morga zom rasiera. Des send em Jâhr 3650 Minuta, was 60 Stond’ entspricht. Uff d’Lebenszeit spart also an Bartträgr 4205 Stond, also 175 Tag.

 guate Woch’ ond em Herrgott sein Sega.