Nr. 239 Dr Schorsch vrzählt vom 23. Mai 2020

Dr Schorsch vrzählt seit 21. Februar 2015 jeden Samschtich en der Bietigheimer, Sachsenheimer, Bönnigheimer Zeitung.

Scho wiedr muss dr Schorsch übr seine Erfahronga beim Eikaufa mit denen „Mund-Nasen-Bedeckungen“ berichta. Natürlich hât au dr Schorsch so scheene, mit große handwerklicha Fähigkeita von seinr Frau gmachte Mundschutzmaska – formschee ond maßgschneidert aus zwei Halbschale, die sich mit dem prächtig gmusterta ond feina Stöffle exakt übr d’Gosch ond dr Zenka schmiagat. Nâch wia vor duat’r sich beim Eikaufe drmit emmer no schwer. So hât’r sich nâch ra Alternativ’ omdoa ond isch bei seiner Schwiegrdochtr fündig wordet, weil di leitet – allerdengs en Rheinland-Pfalz (Stichwort: Förderalismus en Deutschland!) – an Suprmarkt ond dort henn älle a „Face-Shield – Proctive isolation Mask“ uff em Grend ond vorm Gsicht. Des Teil isch klasse, weil’s oim beim Schnauffa ond Schwätza net behendert, ond mr sich, durch den durchsichtigta Kunststoff-Schild, der wo von dr Stirn bis weit onders Kinn gâht, net so eigsperrt fühlt. Außerdem vrstrubbelt dr „Face-Shield“ em Gegasatz zur Stoffmask übrhaupt net dr Vollbart.

Zemlich zfrieda ond au übraus entspannt, gâht jetzt dr Schorsch au hier bei ons mit seim durchsichtiga Schutzschild zom Eikaufa. Dass d’Leut ob dem futuristischa Outfit ganz vrwondert gucka, des kâ mr aushalta. Abr weil des Deng eba durchsichtig isch, sehn dia akutelle „Blockwart“ eba net sofort, dass mr an „Mund-Nase-Schutz“ uffhât. Was soll dr Schorsch sage, es gleicht an a Wondr, dass’r wega denen giftig-bösartige Blick net scho a paar Mâl tot omgfalla isch.

Abr dâ kommt nâ an extrema Vorteil von dem „Face-Shield“ zom traga: Mr kâ mit ma broita ond fröhlicha Grinsa dia grandlende Glotzer ruck, zuck entwaffna.

 guate Woch, bleibat fröhlich ond em Herrgott sein Sega.