Muss mr sich dem neuesta Modediktar en Zeita von Gender-Gerechtigkeit au ondrwerfa? Dia Frâg stellt sich heut’ dr Schorsch, nâchdem jetzt en de eischlägig’ Magazin kolportiert wird, „Hot Pink“ sei dia ohumstößliche Trendfarb’ en dem Sommr: „auffällig und cool“. Wia’s en dere Empfehlung weitr hoißt, sott derjenige, welchr uff’s Ganze gâht, gleichfarbige Kleidongsstückle en Pink auswähla ond dâmit den „Look als Statement tragen“. Zehmlich verwirrend des Ganze, au nâch ganz langem Überlega. Welches Statement dät dr Schorsch mit ma pinka Hemadle, pinke Hosa ond pinka Socka abgeba? Wer will, kennt nâ au no ois druffsetza ond Farba wia Hellbau ond Orange zum pinka Kleidongsstück kombinira. Dr Schorsch glaubt, er dät sich mit Pink zom Affa macha. Mit dr Kombinatio’ aus Pink, Hellbau ond Orange isch’r nâ doch wiedr beim legendäre Hawaihemdle aus der 90er âkomma.

A guate Zeit ond em Herrgott sein Sega.