Es isch ohausweichlich. Jetzt isch wiedr di Zeit, wo fascht jeder moint, mr müsst a Kürbissupp’ kocha. Noi, muas mr net. Der Schorsch hât’s scho etliche Mâl gschrieba, Kürbis send koi kulinarisch hochwertigs Gmüs’, Kürbis send ond bleibet Saufuttr. „Ja, abr dia schmecket doch so fei“, muss sich dr Schorsch oft âhöra. Jâ, di Supp’ schmeckt fei, abr net des Gmüs. Mit Weißwei’, Sâhne, frischem Pfeffer, Muskatnuss, exotischr Kokosmilch, Ingwer odr Sojasoß’ muss mr des woichkochte ond uffgmixte Kürbis-Fruchtfloisch uffmotza, drmit mr übrhaupt an Gschmack neibrengt. Dâ kâ mr glei a dicke Mehlschwitze – aus Buttr, Zwiebel ond Stärkemehl – mit Gmüsbrüah uffkocha ond mit de oba gnannte Gewürz’ uffpeppa, ond hasch’s gleiche.

A guate Woch’ ond em Herrgott sein Sega.