Nr. 251 Dr Schorsch vrzählt vom 24. Oktober 2020

Dr Schorsch vrzählt seit 21. Februar 2015 jeden Samschtich en der Bietigheimer, Sachsenheimer, Bönnigheimer Zeitung.

Dr Schorsch isch froh, dass heut endlich Samstich isch. Noi, net, weil’r heut net schaffa muss, sondern weil ab heut’ seine dunkle Augareng wiedr weg ganget. Es isch seit Montag, 5 Uhr, wiedr gwä, wia jed’s Jâhr seit 1989: Dr Schorsch hât wiedr seine Ohrhörer rauskrâmt und SWR1-Hitparade âghorcht. Zuageba, s’war nehme so wia beim erschte Mâl, als’r mit zwoi Freund’ em Wohnwage im Garta kampiert hât, om ja nex von den „Top 1000x“-Titel zom vrpassa. Jetzt em etwas gsetzta Altr schwächelt halt au dr Schorsch spätestens morgens um drei, ond au die Ohrlappe send nâ feurrot ond glühat fascht von denen Ortstöppsl. Abr schee war’s wiedr, en dene musikalische Erenneronga zom schwelga.

A guate Woch’ ond em Herrgott sein Sega.