Nr. 262 Dr Schorsch vrzählt vom 30. Januar 2021

Dr Schorsch vrzählt seit 21. Februar 2015 jeden Samschtich en der Bietigheimer, Sachsenheimer, Bönnigheimer Zeitung.

Digital, des isch zurzeit des älles omfassende Zaubrwort. Künschtler vrsuachet mit „Online-Streams“ zwar net am Leba, abr immerhin en Erinnerong zom bleiba, ganze Ratssitzonga fendet am Computrbildschirm statt, Veroismitgliedr treffet sich entzwischen „digital“ ond au dia Kirche vrsuchet sich mit ma elektronischa Hallelujah. Was soll dr Schorsch sâge? S’richtige Leba, des dät eigentlich anders ausseha, sofern mr sich nâch fast oim Jâhr no dra donkl erinnert. Ond jetzt probiert se au no dr Fasching in dr digitale Variante, indem se alte Uffzeichnonga von Kostümsitzonga als Fasnetsersatz oim vorsetzat. Des kâ net funktioniera, weil Fasnet net bloss Brauchtum isch, sondern au emmer ganz aktuell „durch dr Kakao ziaga“ von dem, was em letztsche Jâhr so älles passiert isch. Vor ällem isch Fasnet ganz viel Zsammastanda (au em übrtragene Sinn), Omarme ond Tanza. Was bleibt 2021? Ganz viel Fasnetsküchle.