Mr därf mit Fug ond Recht behaupta, an ons Schwâbe isch so manchr Philosof vrlora ganga, weil für fascht jede Lebenslag’ hend mir dr passende Spruch’ parat. „A halbr Balla isch glatt nausgschmissas Geld“, worom grad der Spruch am Schorsch als erst’s einfällt, des kâ sich wohl en dene Zeita jedr selbr raussuacha, ond irgendwia ghert dâ drzua: „A Schdeggapferd frissd meh wia vier Gäul“.

Bassiert jâ grad so viel, dass mr oifach erkenna muas: „Äll Dag gibts äbbas Neus, abbr selda äbbas Guads.“ Weil dia Fasnet jetzt langsam (normalrweis’) zom Höheponkt kommt, ond nâ au rom isch ond mr sich so langsam so mit dr Fastazeit uff Ostra vorbereitet: „Ällas isch bloß a Weile rechtd, hât dr Pfarrer gsagd ond an Oschtra d‘Chrischbaum aus dr Kirch do.“

Dass oin zurzeit bloss oinr bsucha därf, des hend onsere Altvordere scho lang für ebbes Guats ghalta: „A Bsuach macht zwoimol Freud: wennr kommt ond wennr wiedr gâht“, wobei „An Onkel, wo was mitbrengt, isch bessr wia a Tante, wo Klavier spielt.“ Jetzt isch Zeit, zom uffhöra, denkt sich dr Schorsch, weil „Äbbes Domms isch schnell rausgschwätzt.“

A guate Woch’ ond em Herrgott sein Sega.