Fascht älles gibt‘s entzwischa zom Mitnehma. Des amerikânische Schnell-Veschper (Fastfood) sowieso, abr natürlich au dr schwäbische Vettr, dr Lebrkäs‘-Weck. Des isch jâ net weitr schlemm, weil mr kâ jâ dia Vesch perla em ma Papierserviettle heba, nâ gâht‘s au mit em Abfall. Ganz anders sieht des mit dem „Kaffee to go“ aus. Irrsennige Menga von beschichtete Pappadecklbecher ond Plaschtikdeckel braucht mr für den „Kaffee zom drvo laufa“. Hât mr an Genuss drbei“? Eindeutig noi! Mr vrbrennt sich meischt mit dem hoißa Kaffee d‘Gosch, ond wenn‘s besonders bleed lauft, vrsaut mr sich au no s‘Hemad. Dr Schorsch vrweigert sich dera hoiße Briah, ond er nemmt sich oifach a bissle Zeit für sein Kaffee. Grad jetzt, wenn d’Sonn‘ so schee uff uns nabebrägelt, dâ sitzt mr doch oifach gerne für a Weile em Straße- odr Eiscafé onderm Sonnaschirm, ond lässt‘s sich beim Kaffee guat gange, ond hât drbei sogar no Zeit, übr älles Mögliche nâchzomdenka – eba au übr den „Kaffee zom drvolaufa“.

A guate Woch‘ ond em Herrgott sein Sega