Dr Schorsch vrzählt vom 13. Februar 2016

Dr Schorsch vrzählt seit 21. Februar 2015 jeden Samschtich en der Bietigheimer, Sachsenheimer, Bönnigheimer Zeitung.

Mir Schwâbe send halt Käpsela. Dr Schorsch duat des jeda Samschtich an dera Stella beweisa. Seit am Freitag isch’s jetzt abr eideutig bewiesa, weil dia Kerle vom Ligo-Observatorium en Amerika henn feschtgschtellt, was onser Albertle aus Ulm schon vor 100 Jâhr berechnet hât. S’Albertle Einstein isch nämlich drvo ausganga, älle Körper schicket Gravitationswella aus, grad so, wia wenn mr an Schtoi en a Teichle schmeist. Seit 50 Jâhr probiert se jetzt, dia Ânâhm vom Albertle au em Universum nâchzomweise, ond jetzt henn se mit ma riesiga Fernrohr beobachtet wia zwoi ohglaublich große „Schwarze Löcher“ vrschmolza send ond drbei dia Gravitationswelle entstanda send. Ohsennig kompliziert isch des, a Mensch mit ra gsonda Halbbildong vrschtâht des oifach net. Abr es isch scho a prima Sach’, wenn mr sich als Schwâb mit so ma Hauptkerle, wia des onser Albertle isch, schmücka kâ. Vermutlich dät des dem Weltbürgr Einstein gar net gfalla, abr der isch jâ vor 61 Jâhr gschtorba – ond kâ sich nemme wehra. Also protzet mir drmit weitr.

I wünsch’ Euch a guate Woch’ ond em Herrgott sein Sega