Heut’ will dr Schorsch wiedr ebbes richtig schtella. Eher zufällig isch diesr Tag uff der Mark Twain ond di Tatsach’ gschtossa, dass der Kerle 1878 bei seinr Europatour au von Bad Wimpfe bis nâch Heidelberg uff am Neckar mit ma Floss romgschippert isch, was der Schriftsteller offabar recht möga hât. „Deutschland im Sommer ist die Vollendung des Schönen, aber niemand, der nicht auf einem Floß den Neckar hinuntergefahren ist, hat die äußersten Möglichkeiten dieser sanften und friedlichen Schönheit wirklich begriffen und ausgekostet“, schreibt’r en seim „Bummel durch Europa“. Zwar hât’r offiziell net so di rechte Einschätzung von onserm schwäbischa Schtrom, weil wia’r gsagt hât, sei „der Neckar an vielen Stellen so schmal, dass man einen Hund hinüberwerfen kann, falls man einen hat“. Hano! Weil mir woiß jâ, dr Mark Twain hât während seinr Europareis’ 1878/79 sein Roman „Die Abenteuer des Huckleberry Finn“ fertig gschrieba, ond dâ liegt jâ nah’, dass’r vor lautr Hoimweh oifach dr Mississippi mit onserem Neckar vrwechselt hât.

A guate Woch’ ond em Herrgott sein Sega