Eigentlich hât dr Schorsch a Ode an die schwäbische Schriftstellerin Ottilie Wildermuth, die vor 200 Jahr’ gebora worda isch, verfasse welle. Des muas jetzt warta. Eigentlich hât dr Schorsch den Schwur abglegt, er dät en dera ondrklassige Saison nex übr dr VfB Stuttgart – sein Herzensveroi – schreiba. Abr was jetzt bassiert isch, des schreit drnâch, ond muas aus schwäbischr Sicht eigordnet werda. Was isch passiert? Der Kicker, der en seim tiefschte Innera gelb-schwarz lackiert isch, hât jessesmäßig übr d’Schtreng gschlage: Während seine Kamerade sich mit ällem was se henn uff den hoffentlich gelingenda Uffschtieg vorbereita, was macht der Haderlomp? Er ziagt mittla en dr Nacht om d’Häuser, ond kâ sich als Vrteidigr net amol recht vrteiga ond lässt sich âschtändig Gosch vrschlage. Des oinzig Richtige henn dia VfB-Kerle gmacht, ond den Hondsfott zom Teufl gjagd. Au wenn manche vrblendete Âhänger vom VfB jetzt wiedr a Fass uffmachet, om dene Vroisvrantwortliche an dr Karre zom fahre. Liabe Leut’, dr VfB isch koi Dorfclub aus em Ruhrpott, des isch dr V-F-B, ond dâ gâht so a Schlägrei oifach net.

A guate Woch’ ond em Herrgott sein Sega