A Hoch uff di pharmazeutisch‘ Industrie. Jetzt hât doch au dr Schorsch di bleed Grippe vrwischt. Abr bekanntlich hilf viel au viel: So fangt dr Morga mit ma kloine Hustalösr mit ma Hauch von Schmerzmittel â. Fenf Mal am Tag gehöret zom Anti-Grippe-Menü jeweils 30 Hustatröpfle, dia durchaus a fei‘s Gschmäckle hen. Garniert wird des Ganze mit Halsweh-Schlotz-Tablettla, dia ganz nach Gusto gnomma werdet. Wenn‘s nâ em Lauf des Tags so recht schwammig em Obrstüble wird ond Glenk so richtig knacket, nâ gibt‘s a rechte Portio von dene guate Ibu‘s. Weil des älles abr net so richtig durchschlägt, hât sich dr Schorsch no a Sieba-Tag-Ratio an Antibiotika bsorgt, di‘r hoffnungsvoll emmr om d‘Mittagszeit neipfeift. Als begleitende Getränk‘ standet Ingwerwasser ond jede Menge Pfefferminztee uff der Getränkekart‘.

Sollet jetzt abr dia ganze Arzneia net helfa, nâ stâht übr‘s Wochenend‘ a Rosskur uff em Speisezettel. Dr legendäre Eierwei‘, den schon dia Altvordere vom Schorsch übr dr Schellakönig globt henn. Ob der hilft, des woiß mr net so genau, abr spätestens, wenn mr des Höllagsöff intus hât, na isch oim oifach die bleed Grippe egal.

A guate Woch‘ ond em Herrgott sein Sega