Hoffentlich send‘r älle guat ens neue Jâhr niebergschlupft. Dr Schorsch hât sich a bissle mit ma inwändige Virus romplâgt, was abr au sei Guat‘s gkeht hât. So hât‘r letztendlich den ganza alte Dreck em alte Jâhr zrücklassa kenna. Zwangsweis‘ send na au öffentliche Toiletta dia bevorzugte Âlaufstationa für ihn gwä, mit doch recht ârüchige Werbeidea. Stellat Euch doch vor Euerm geischtiga Âug‘ a Urinal mit ma Fernseherle drübr vor. Ond für was henn se dort gworba? A dampfede donkle Briah mit leichtem Schaum isch zom seha gwa, also genau des Richtige, wenn mr sei Notdurft verrichtet ond wenn‘s oim em Maga romort. So richtig freua kâ mr sich übr den uff dem Display stimmungsvoll präsentierta Kaffee eigentlich gar net, zumal dr Nachbr seine rückwändigen Ausdünstungen kaum kontrolliera kâ. Also nâ scho liabr an frischa Pfefferminztee.

A guate Woch‘ ond em Herrgott sein Sega.