Was isch eigentlich aus dem sprichwörtlicha Volk von de Dichtr ond Denka worda? Di Frâg treibt dr Schorsch om, weil er sich übrlegt, was für d’Leut’ bsondrs wichtig isch. Em letzschta Jâhr hât’s tatsächlich mit’m Horta von Klopapier âgfanga ond hât sich gesteigert mit dr Hefe, mit Mehl ond mit Nudla. Also guat, Nudla, des kâ mr noch verstanda. Jetzt send’s also d’Frisürla, als wia’s nex wichtigrs wia an saubr gstutzta Grend ond scheene ondulierte Dauerwella geba dät. Am Schorsch dätat dâ scho no a baar andre Sache eifalla, dia mr jetzt braucht. Uff jeden Fall isch jetzt sichergestellt, dass d’Leut’ am 14. März perfekt frisiert ihr Kreuzle uff’m (Brief) -Wahlzettel macha könnat.

A guate Woch’ ond em Herrgott sein Sega.