S’isch â alte Händelei, wann wird dr Christbaum uffgestellt ond gschmückt? Für d’Weihnachtstraditionalista isch des koi Frâg, dr Baum wird am Morga vom Heiligaâbend gschmückt ond koin Tag frühr. Abr wia des so mit de Traditiona eba isch, mr braucht sich ja bloss ans Lametta am Christbaum erinnra – gibt’s nemme. Worom? Vielleicht isch’s omweltschädlich odr net nâchhaltig. Schad’ drom isch’s für dr. Schorsch ällaweil.

Uff jeden Fall nemmat die Christbaum-früh-em-Advent-Schmücker emmer meh überhand. Viele hend bereits am zwoita Adventssonntag den prächtig glänzenda Baum in dr Stub standa. Des hat natürlich au für d’Weihnachtstraditionalista immense Vorteil. Schließlich hat mr so viel mehr Zeit für den scheena Brauch vom „Christbaum-Loba“, den’s bei ons em Schwäbischa gibt.

Für älle, die des net kennat: Mr bewundert ond lobt den Christbaum von jemand ond wird drnâch mit ma Schnaps belohnt. Früher isch mr danâch zom nächsta zoga, ond hât wenigsten oin von dene bisherige Christbaum-Lobr mitgnomma. Am Schluss isch nâ recht große Grupp’ durch dr Flecka zoga.

A guate Woch’ ond em Herrgott sein Sega.