A bissle a schlecht’s Gwissa hât dr Schorsch scho. Trotz ällr berechtigtr Kritik an China – wobei’r sich di Âmerkong von de westliche vrlogene Krokodilsträne net vrkneifa kâ – wird dr Schorsch en de nächste 16 Tag möglichst komplett durchglotza. Zom ersta Mâl hat’r des bewusst 1964 mit dene Spiele en Innsbruck gmacht, dâmals grad amol mit 34 Wettkämpf in zehn Disziplina. Jetzt en Peking, wo se sieba Stonda frühr drâ send, send’s jetzt 109 Wettbewerb en 15 Disziplina, ond dâ send spätestens am End’ von dr erschta Woch’ dicke Auga ond schwarze Augereng zom erwarta. Bei seine 16. Wintrspiel freut sich der Schorsch besonders uff die schwäbische aller olympische Sportarta: Currling. Weil was gibt’s Schöneres, wie blank polierte Stoi uff a ebenso saubere Eisbâh’ zum Schmeißa ond drbei au no mit ma Kehrbesa des Eis zom Schmelza zom brenga. Schwäbische Kehrwoch’ uff sportlich eba.

A guate Woch’ ond em Herrgott sein Sega.