Ja, was isch denn des? Ganz lila ond gelb gsprengelt isch seit heut’ s’Gras em Vorgarta. Henn mr denn scho Frühleng? No net ganz, abr dia Krokuss’ wellet sich uff jeden Fall schon mâl zeiga. Des isch a guat’s Zeicha, grad jetzt wo dr farbafohe Fasching âmol wiedr dr Bach nagâht. Weil, falls ihr’s no net gmerkt henn, ab Montag wär eigentlich Narretei âgsagt mit Narri-Narro, Ahoi, Helau ond was sonscht no so grufa wird – ond mit Fasnets-Küchla. Obwohl Fastnet-Küchla (mit Dürrobst) ganget au ohne Fasching. Ebbes Guat’s hat’s, wenn mr jetzt en dene net-närrische Tag net übr Streng schlägt. S’duat so koi Not, ab Aschermittwoch bis Ostra zom Faschta. Also lasset mr dia 40-tägig Kaschteierei en dem Jâhr oifach bleiba. A guate Woch’ ond em Herrgott sein Sega.