Heidenei ond Helau, jetzt wird’s au des Jâhr wiedr nex mit dem schwäbisch-rheinländischa Kulturaustausch. Net bloss, weil der russische Kantschädl mit seinr schreckliche Kriegstreiberei oim di Lust am Fasching vrgällt, noi au wega Corona hend em Schorsch seine Karnevalskammerada en Boppard am Mittelrhein sämtliche Aktivitäta abgsagt. Deshalb gib’s jetzt zom zwoita Mâl koine schwäbisch-politische Reim’ en dr rheinischa Bütt ond s’hoißt: Kulturaustausch ade. Ond so bleibt’s au bei sechs Orden fürn Schorsch, mit dene er vor 2021 belohnt worda isch. So bleibt nex anders übrig, wia mit Fasnetsküchle dr Fasching 2022 zom beganga. Au net schlecht, ond vor älle Deng höchscht schmackhaft. Vielleicht gâht dr Schorsch au heut’ Âbend ens Erligheimer Bürgerhaus. Weil dort gibt’s wiedr an Vinylâbend, wo mr seine schwarze Schallplatte mitbrenga därf, zu dene mr sei ganz persönlich’s Gschichtle vrzapfa kâ.

Bei ällem trotzdem a guate Woch’ ond em Herrgott sein Sega.