Jetzt kommt’s abr widr knüppldick. Nâch herrlich warme Märztâg, klappret oim jetzt ganz ordentlich Zäh’ vor Kälte. Ganz zufällig isch dr Schorsch bei seim reglmäßiga Schmöckra en der „Etymologie des Schwäbischen“ von Hermann Wax uff die Bezeichnong „Hurnigel“ beziehungsweis’ „Hornigel“ gstoßa, womit mr „das rasch aufziehende und rasch vorübergehende Unwetter mit Wind, Schnee, Regen, Graupen besonders im Frühjahr“ bezeichnet. Möglicherweis’ stâht die Bezeichnong em Zammahang mit dem „Wintermonat Hornung (Februar), der die erste Hurnigl bringt“. Ond wenn mr scho tief en dia Etymologie einsteigat, nâ kennt mr jetzt wiedr an „Kalfakter“ braucha. Des isch nämlich dr Heizer en de Schula odr Klöstr gwä. D’Schwoba hend abr aus dem, „wo niedrige Geschäfte verrichtet“, glei a Schempfwort gmacht. Danach isch a Kalfakter a Faulenzer, Nichtstuer,Verleumder oder charakterloser Mensch, uff den koi Vrlass isch.

 guate Woch’ ond em Herrgott sein Sega.