S’isch doch zom vrzweifla. Uff nix meh’ isch Vrlass. Selbst dia Eisheilige schwächlet total. Mamertus, Pankratius, Servatius, Bonifatius und d’Sophie steh’n ab Mittwoch, 11., bis Sonntag, 15. Mai, em Kalender. Glaubt mr de Wettrfrösch’, nâ wird’s en dene Tag zwische 22 und 26 Grad warm, erscht am 16. Mai gâht’s mit dem Temperatura uff 17 Grad a bissle abwärts. Omsonst also die warme Wintrkittel ond dicke Wollsocka no net eigmottet, kurzärmlige Hemdla, kurze Hose ond Sandale braucht en dem Jâhr während de Eisheilige. Des isch net bloss wirtschaftlich a Katastroph’, weil dia Pflanzehändler net a Zwoitsmâl ihre Sommrbluma an dia ganz schnelle Blumakäufer von Âfang April verkaufa könnat. Bei dene Eisheiligetemperatura wird wohl nix meh’ vrfriera. So wird di Weitsicht vom Schorsch net belohnt, ond au des vielsagende Grinse übr dia sonst hennige Blümle entfällt. Ganz em Gegatoil, während sich dia Frühpflanzer übr üppige Blüta freuat, dauert’s bei ons ebba ebbes länger.

 guate Woch’ ond em Herrgott sein Sega.