Seit knapp ma halbe Jâhr müsset mr ons jetzt mit dere Kampagne „The Länd“ romärgra. Onsere Landesobere henn gmoint, mr müsst drmit „eine neue, starke Marke, die auch international Strahlkraft entwickeln und neue Maßstäbe setzen wird“ nausposauna. „Wir könnet älles außer hochdeutsch“ isch doch so passend für onser schwäbische Selbstvrständlichkeit, ond s’kommt oim jetzt en dr Senn „mir könnet älles außer Slogan.“

Dr Schorsch braucht „The Länd“ net. Doch andre sehet des anders. Beispielsweis’ hât a Kämmerer sein Haushaltsplan jetzt mit „The Plän“ übrschrieba, ond bei de Berâtonga hât a Fraktionssprechere ihre Eischätzungen mit „The Änd“ abgeschlossa – Augabrauaronlza beim Schorsch inklusiv. Mr kennt jetzt saga des isch „A Krämpf“, wenn mr so uff des Heckagäuleszügle nuffsprengt. Weil „The Länd“ bisher rond 21 Milliona Euro’la kostet hât, isch des abr „A Schänd“.

 guate Woch’ ond em Herrgott sein Sega.