Wenn’s om sportliche Bewegong gâht, nâ hat’s dr Schorsch seither mit dem englischa Premierminischtr Winston Churchill ghalta. Dr war koi Kostvrächter, hât gern Zigarra graucht ond Whisky dronka ond isch emmerhin 91 Jâhr alt worda ond hât den legendäre Spruch „no Sports“ gsagt. So hât dr Schorsch bisher au koin Sport trieba, bei dem mr sich bewega muas – segla isch sei Leideschaft, ond dâ hockt mr ja bekanntlich. Mr hât die Pinne en dr Hand ond di Vrantwortong für’s Schiffle ond Mannschaft uff det Schultra: „I’m right, I’m wrong, I’m still the Captain“. (I mog recht oder falsch liega, des isch egal, weil i ben dr Kapitän). Doch jetzt isch älles anders beim Schorsch. Seit übr oim Jâhr übrlegt’r sich a moderns Fahrrädle mit Motor zom Kaufa, ond jetzt hât er’s doa. Was soll’r saga, jetzt send dia Bückl koi oübrwendbars Hendrnis meh, ond mr duat net schnaufa ond au net schwitze Es isch ofassbar, dr Schorsch bewegt sich jetzt gern.

 guate Woch’ ond em Herrgott sein Sega.