S‘Leba uff em Dorf isch schee ond anders. Manchmâl isch‘s laut, wenn Traktora ond Mähdreschr fahret, gelegentlich isch‘s störend, wenn morgens bei Sonnauffgang dr Gockel schreit oder zur volla Stond die Kirchaglocka bimmlat, ond es kâ au ganz schee stenka, wenn Mist odr Briah gführt wird. Abr des älles macht‘s Leba uff em Land aus. Wenn mr em Dorf uffgwachsa isch, nâ kennt mr‘s net anders, wer von dr Stadt uffs Land zoga isch, sott sich halt drâ gewöhna. Letzschteres isch abr net bei alle so. Oft wird romnörgelt ond em schlemmsta Fall dehn se, wenn se ebbas stört, au noch grichtla. Mr kâ jâ zu den bayrische Politiker standa, wia mr will (ond em Schorsch dät schnell etliche Kantschädl eifalla), jetzt abr hât dr Florian Streibl (Freie Wähler) di Idee vom „Kulturgut Sinneserbe“ ket. Damit sollet – net bloss en Bayern – Geräusche ond Gerüche em Landleba zom Kulturgut erhoba ond so ondr Schutz gstellt werda. Prima, sagt dr Schorsch.

 guate Woch‘ ond em HerrGott sein Sega.