Dr Schorsch isch so froh ond ergriffa, weil bei ons in „The Länd“ hend mir an Minischtrpräsident, wo so fürsorglich, klug ond vrausschauend isch für seine Landeskendr. Es isch ohheimlich beruhigend, dass se ons wia kloine Kendr an d’Hand nehmat ond ons saget, was mr doa sollet, weil doch dr Strom so teur ond bald au so knapp isch.  Z’erst hât dr Minischtrpräsident gsagt, mr sott sich mit ma Wäschlappe wäsche ond net duscha, geschweige denn gar bada. Jetzt hât er no ois druffglegt, ons ens Stammbuach gschrieba, am Beste sei’s, wenn mr tropfende Wasserhähna repariert, ohdichte Fenstr abdichtet, d’Spülmaschee bloß mit Gschirr laufa lässt ond nachts Heizong rondrdreht. Damit mir Duppeler des au vrschtandat, hât’r em a YouTube-Filmle zeigt, wia ma Heizkörper kältr stellt. Dr Schorsch isch so dankbar, dass er weiterhin gern sein Solarstrom für zwölf Cent vrkauft ond für dr kaufte Strom 54 Cent zahlt.

 guate Woch’ ond em Herrgott sein Sega.