Ach, no so guat erinnert sich dr Schorsch an dr Wolle Kriwanek, wia dr liebenswerte Freind ond Musikr vor viele Jâhr beim ma Ufftritt uff Wörtr, dia vom Publikum zuagrufa worda send, wild reimend an Blues gsonga hât. Drbei isch aus dem Wörtle „Knoblauch“ di Zeile rauskomma: „Dâ nemsch an Kobel, nâ kriag’sch so sooo an Hobel.“ Wia au emmr, fakt isch, dr Kobel isch a saugsonde Knolle ond erscht gestern hât dr Schorsch glesa, mr sott jeda Tâg an kloina Zeh’ roh vespra. Nâ dät sich dr Wirkstoff Allicin em Ranza so richtig austoba, was letztendlich dia freie Radikale hemacht ond so des Älterwerda langsamr macha dät. Außerdem wird di Durchblutong besser, weil dia Âdra weiter werdet. Ond oba druff kommt no, dia Vitamine ond Mineralia em Knobel stärket des Immunsystem.

Mehr muffelt halt ohvrschämt vom roha Knobel, abr mr könnt’ jâ während dera Rosskur drhoim bleiba, hat’s gehoißa.

 guate Woch’ ond em Herrgott sein Sega.