Hoch dr Kolba, nei dr Zenka, morga müsset mr Wassr trenka. Des isch jetzt en de nächschte zwoi Wocha s’Motto. Weil en Cannschtatt uff’m Wasa grasset em Moment koine Hasa, dort fließt’s Bier wia aus Wildbäch en dia Litrkolba en de Feschtzelt. Des Bier isch dort net bloß sau teur, mr muas schon au a bissle Glück hann, wenn mr dort a Plätzle kriaga will – wenigschtens am späte Mittag ond am Âbend isch’s recht schwer dort ondrzomkomma. Es sei denn, mr ghört zua de „wichtige Leut’“ em Ländle, nâ isch’s leicht. Abr au wer berühmt werda will, sott uff’s Cannstatter Volksfescht ganga. Weil wenn mr sich a bissle drneba benemmt, nâ kommt mr jetzt dort ens Fernseha. Dia für d’Sicherheit Vranwortliche übrwachet nämlich des Fescht mit oglaublich viel elektronische Kameräla. So schtâht r’Filmkarriere nex me em Weg, wenn mr gschwend an kloina Händl âfangt, randalliert, wenn mr net ens Zelt neiglassa wird, odr wenn mr ondr gröschtm Druck sei Notdurft an irgendoinr donkla Eck vrrichtet. Also ziaget eur bescht’s Gwand â, idealerweis a Ledrhos’ odr a farbigs Trachtakloidle, ond dehn euch mit ma fescha Frisürle ond ettlich Farb uff de Backa (dehne em Gsicht) uffhübscha. Vrgessat abr net an dicka Geldbeutl.

A guate Woch’ ond em Herrgott sein Sega