Übr dr legendäre LKW mit ABS (Leberkäsweck mit a bißle Senf) – des schwäbische „Fastfood“ schlechthin – hat dr Schorsch ja an dera Stell‘ gschriebe. Abr dr Lebrkäs isch jâ für ons Schwabe fast schon universell einsetzbar. Klar, âbrägelt in dr Pfann‘ des gâht emmer, a Ochsaaug no druff, nâ wird’r schon zur ra recha Leckerei. Wenn abr zwischa’m Lebrkäs ond dem Ochsaaug no a Scheib Käs vrschmilzt ond mit gröschte Ziebel des ganz vrfeinert wird, nâ isch a richtiger Hochgenuss. Nâ isch’s scho fast egal, ob mr an Ranka Baurabrot drzua hât odr vielleicht sogar en Schmalz gröschtete Grombiara. Wie vielfältig dr Lebrkäs isch, des zeigt sich, wenn mr ihn mit Soß’ ond Kartoffelsalat vespert oder gar aus feine Stroife an herrlich deftiga Wurstsalat macht. Ond wenn älle Streng’ reißet, nâ kâ mr aus dem Lebrkäs au no an kaloriareicha Floischsalat mit Gürkle ond Mayonäs mache. Ach, mr wird grad vrückt, wenn mr sich des älles vorstellt.

A guate Woch‘ ond em Herrgott sein Sega.